ஐக்கிய அரபு அமீரகத்தில் இன்று நடைபெற்ற 13 வது ஐபிஎல் தொடரின் முதல் லீக்கில் மும்பையை வீழ்த்தி சென்னை அணி அபார வெற்றி

சென்னை, மும்பை அணிகளுக்கு இடையிலான முதல் லீக் போட்டியில் டாஸ் வென்ற சென்னை பந்து வீச முடிவு செய்தது. மும்பை அணி 162 ரன்கள் எடுத்த நிலையில், அம்பத்தி ராயுடுவின் அதிரடி ஆட்டத்தின் மூலம் சென்னை அணி வெற்றி பெற்றது.

மும்பை அணி தொடக்கத்தில் அதிரடி காட்டியது. டி காக் 20 பந்துகளில் 33 ரன்கள் விளாசினார். ரோஹித் ஷர்மா 12 மட்டுமே சேர்த்தார். மனோஜ் திவாரி நிதான ஆட்டத்தை வெளிப்படுத்தி 42 ரன்கள் சேர்த்த நிலையில், சூர்யகுமார் யாதவ் 17 ரன்களுக்கு நடையைக் கட்டினார்.
ஹார்த்திக் பாண்டியா 2 சிக்ஸர்கள் உட்பட 14 ரன்கள் சேர்த்தார். பொல்லார்ட் போன்ற வீரர்கள் வந்த வேகத்தில் நடையைக் கட்டியதால் மும்பை அணி 20 ஓவர்கள் முடிவில் 9 விக்கெட்கள் இழப்பிற்கு 162 ரன்கள் எடுத்தது.

பந்து வீச்சில் மிரட்டிய சாவ்லா தொடக்கத்தில் ரோஹித் ஷர்மா விக்கெட்டை வீழ்த்தி ஆட்டத்தில் திருப்புமுனையை ஏற்படுத்தினார். தீபக் சகார், சாம் கரன் தலா ஒரு விக்கெட்டை வீழ்த்தினர். ரவீந்திர ஜடேஹா 4 ஓவர்களில் 42 ரன்களை விட்டுக்கொடுத்து 2 விக்கெட்களை கைப்பற்றினார்.

163 ரன்கள் எடுத்தால் வெற்றி என்ற நிலையில் களமிறங்கிய சென்னை அணிக்கு தொடக்கமே அதிர்ச்சியளிக்கும் வகையில் அமைந்தது. முரளி விஜய் (1), வாட்சன் (4) அடுத்தடுத்து ஆட்டமிழந்து அதிர்ச்சியளித்தனர். 6 ரன்களுக்கு இரண்டு விக்கெட்களை இழந்து தடுமாறிய சென்னை அணி ராயுடு, டு பிளேசிஸ் பார்ட்னர்ஷிப் மூலம் மெல்லச் சரிவில் இருந்து மீண்டது. ராயுடு 48 பந்துகளில் 3 சிக்ஸர், 6 பவுண்டரிகளில் உதவியுடன் 71 ரன்கள் குவித்தார்.

டு பிளேசிஸ் 58 ரன்கள் சேர்த்து கடைசி வரை களத்தில் இருந்தார். சாம் கரன் தனது அதிரடி ஆட்டத்தின் மூலம் 6 பந்துகளில் 2 சிக்ஸர்களுடன் 18 ரன்கள் குவித்து வெற்றிக்கு வழிவகுத்தார்.

10 பந்துகளுக்கு 10 ரன்கள் தேவைப்பட்ட நிலையில் தோனி களமிறங்கினார். இறுதியில், 19.2 ஓவர்களில் சென்னை அணி 5 விக்கெட் வித்தியாசத்தில் வெற்றிபெற்றது. மும்பை அணியில் அனைத்து பந்து வீச்சாளர்களும் தலா ஒரு விக்கெட்டை வீழ்த்தினர்.